शहर भाजपच्या राष्ट्रीय एकता दौडला उत्स्फुर्त प्रतिसाद
पाच हजारापेक्षा अधिक स्पर्धेकांचा सहभाग;
खेळाच्या माध्यमातून एकात्मतेला बळकटी-अजित पाटील कव्हेकर
लातूर/प्रतिनिधीः- देशाचे माजी गृहमंत्री तथा लोहपुरुष सरदार वल्लभभाई पटेल यांच्या 150 व्या जयंतीनिमित्त शहर जिल्हा भाजपाच्या वतीने राष्ट्रीय एकता दौडचे आयोजन करण्यात आले होते. विविध चार गटांसाठी आयोजित करण्यात आलेल्या या दौडमध्ये पाच हजारापेक्षा अधिक स्पर्धकांनी सहभाग घेऊन या दौडला उत्स्फुर्त प्रतिसाद दिला. देशाची एकात्मता अखंडीत ठेवण्यासाठी क्रिडाक्षेत्राचे मोठे योगदान असून खेळाच्या माध्यमातून एकात्मतेला अधिकची बळकटी मिळते असे सांगत भाजप शहर जिल्हाध्यक्ष अजित पाटील कव्हेकर यांनी या एकता दौडला उत्स्फुर्त प्रतिसाद दिल्याबद्दल स्पर्धकांसह लातूरकरांचे आभार व्यक्त केले.
एक भारत श्रेष्ठ भारत ही संकल्पना प्रत्यक्षात उतरविण्यासाठी देशाचे तात्कालीन गृहमंत्री तथा लोहपुरुष सरदार वल्लभभाई पटेल यांनी देशातील 562 संस्थांने खालसा करत त्यांना भारतात सहभागी करून घेतले होते. त्यांच्यामुळेच निजाम राजवटीतून मराठवाडा मुक्त झालेला होता. त्यामुळेच लोहपुरुष सरदार वल्लभभाई पटेल यांच्याप्रती कृतज्ञता व्यक्त करण्यासाठी लातूर शहर जिल्हा भाजपाच्या वतीने आज सोमवार दि. 10 नोव्हेंबर रोजी सकाळी 6.30 वा. राष्ट्रीय एकता दौडचे आयोजन करण्यात आले होते. सदर एकाता दौड विविध चार गटांसाठी आयोजित करण्यात आलेली होती. यामध्ये वरिष्ठ गट, युवा गट, तरुण गट व बाल गट यांचा समावेश होता. चारही गटातून पाच हजारापेक्षा अधिक स्पर्धकांनी या दौडमध्ये सहभाग नोंदविला. दोन टप्प्यात आयोजित करण्यात आलेली या दौडचा शुभारंभ जेएसपीएम शैक्षिणक संकुल येथून शहर जिल्हाध्यक्ष अजित पाटील कव्हेकर, शहर निवडणूक प्रमुख अर्चना पाटील चाकूरकर, माजी शहर जिल्हाध्यक्ष गुरुनाथ मगे, प्रदेश प्रवक्ता प्रेरणा होनराव यांच्यासह विश्वविक्रमी सृष्टी जगताप यांच्या हस्ते हिरवा झेंडा दाखवून करण्यात आला.
जेएसपीएम शैक्षणिक संकुल ते संत सेवालाल चौक (एक नंबर) ते पुन्हा जेएसपीएम शैक्षणिक संकुल असा तीन किलोमीटरचा एक टप्पा आणि जेएसपीएम शैक्षणिक संकुल ते संविधान चौक ते पुन्हा जेएसपीएम शैक्षणिक संकुल असा सहा किलोमीटरचा दुसरा टप्पा होता. या स्पर्धेत लातूर जिल्ह्यासह कर्नाटक राज्यातील व जालना, सोलापूर, बीड, नांदेड या जिल्ह्यातील स्पर्धकांनी आपला सहभाग नोंदविला होता. या एकता दौडच्या वरिष्ठ गटातून पुरुषामधून विकास कातपुरे यांनी प्रथम, नेनाराम कडपासरा यांनी द्वितीय तर किशन चिंचोलवाड यांनी तृतीय क्रमांक पटकावला, वरिष्ठांच्या महिला गटातून विद्या हेच्च यांनी प्रथम, उमा एस.एम यांनी द्वितीय तर बी.सी. पार्वती यांनी तृतीय क्रमांक पटकावला, युवा पुरुष गटातून ऋषीकेश वावरे प्रथम, हणमंत पवार द्वितीय तर पंकज राठोड तृृतीय, महिला गटातून पुष्पा राठोड प्रथम, मयुरी वाघमारे द्वितीय तर नैना वाघमारे यांनी तृतीय क्रमांक मिळविला. तरुण विद्यार्थी गटातून कृष्णा पडळे प्रथम, शुभम मुलांडे द्वितीय तर रोहित कापसे तृतीय, तसेच तरुण विद्यार्थींनी गटातून श्रावणी जगताप प्रथम, दिव्या राठोड द्वितीय तर रुपाली मुंडे तृतीय क्रमांक मिळविला. बाल मुलांच्या गटातून ओमसाई वाडेकर प्रथम, अनिकेत सगर द्वितीय, ओमसाई करुडकर तृतीय तर बाल मुलींच्या गटातून सादिया सय्यद प्रथम, विद्या होळकर द्वितीय तर समिक्षा वेरुळे हिला तृतीय क्रमांकाचे बक्षीस मिळाले.
या विजेत्यांना शहर जिल्हाध्यक्ष अजित पाटील कव्हेकर, निवडणूक प्रमुख अर्चना पाटील चाकूरकर, माजी शहर जिल्हाध्यक्ष देविदास काळे, प्रदेश प्रवक्ता प्रेरणा होनराव, शहर जिल्हा सरचिटणीस रागिणी यादव, निखील गायकवाड, संजय गिर, प्रविण कस्तुरे यांच्या हस्ते पारितोषक देण्यात आले. यावेळी अजित पाटील कव्हेकर म्हणाले की, एक भारत श्रेष्ठ भारत ही संकल्पना मांडून देशाची एकात्मता अखंड ठेवण्यासाठी देशाचे लोहपुरुष सरदार वल्लभभाई पटेल यांचे योगदान अविस्मरणीय आहे. त्यांच्यामुळेच मराठवाडाही निजाम राजवटीतून मुक्त होऊन तो भारतात सहभागी झाला. देशाची एकात्मता अबाधित ठेवण्यासाठी पंतप्रधान नरेंद्र मोदी यांनी सातत्याने पुढकार घेतला असून याकरीता त्यांनी आपले विचारही वेळोवेळी देशापुढे मांडलेली आहेत. क्रिडा क्षेत्राच्या माध्यमातून एकात्मतेला अधिक बळकटी मिळते असे सांगून खेळाच्या माध्यमातून राष्ट्रीय एकात्मता अबाधित ठेवण्यासाठी खेळाडूंसह नागरीकांनी आपले योगदान द्यावे असे आवाहन केले.
यावेळी निवडणूक प्रमुख अर्चना पाटील चाकूरकर, प्रदेश प्रवक्ता प्रेरणा होनराव यांनीही आपले मनोगत व्यक्त केले. याप्रसंगी मंडल अध्यक्ष निर्मला कांबळे, सुरेश जाधव, राहुल भुतडा, काकासाहेब चौगुले, विशाल हवापाटील, रोहित पाटील, गोपाळ वांगे, सचिन सुरवसे यांच्यासह युवा मोर्चा अध्यक्ष ओम धरणे, महिला मोर्चा अध्यक्षा शितल मालु, पवन अल्टे, प्रमोद गुडे, उपाध्यक्ष श्रीकांत राजंणकर, प्रा. उदय देशपांडे, गणेश गोमचाळे, अस्मिता काटे आदींसह भाजप पदाधिकारी, स्पर्धक, नागरीक मोठ्या संख्येने उपस्थित होते. एकाता दौड यशस्वी करण्यासाठी जेएसपीएम शैक्षणिक संस्थेच्या क्रिडा विभागाने परिश्रम घेतले.
