*गुंटूर येथे होणाऱ्या राष्ट्रीय परिषदेत लातूरच्या नदी पुनर्जीवन प्रकल्पाचे होणार सादरीकरण*
-*प्रकल्पाचे समन्वयक महादेव गोमारे उ करणार सादरीकरण;*
*केंद्र सरकारच्या या परिषदेला सुरुवात*
लातूर : केंद्र सरकारच्या वतीने आंध्र प्रदेशातील गुंटूर येथे दि. १० आणि ११ नोव्हेंबर रोजी दोनदिवसीय राष्ट्रीय परिषद आणि राष्ट्रीय जल महोत्सवाचे आयोजन करण्यात आले आहे. या परिषदेसाठी लातूर येथील नदी पुनर्जीवन आणि जलसंधारण कामाचे समन्वयक महादेव गोमारे यांना विशेष निमंत्रित करण्यात आले आहे.. या परिषदेत ते लातूरच्या नदी पुनर्जीवन प्रकल्पाचे सादरीकरण करणार आहेत.
केंद्र सरकार आणि आंध्र प्रदेश राज्य सरकारच्या वतीने गुंटूर येथे दि. १० आणि ११ नोव्हेंबर रोजी राष्ट्रीय जल महोत्सव आणि राष्ट्रीय परिषदेचे आयोजन करण्यात आले आहे. या परिषदेसाठी देशातील सर्व राज्यातील जलसंधारण विभागाचे सचिव आणि तज्ञ मंडळी यांना निमंत्रित करण्यात आले आहे. या महोत्सवाचे उद्घाटन १० नोव्हेंबर रोजी केंद्रीय कृषिमंत्री शिवराज सिंह चौहान यांच्या हस्ते होणार आहे. याप्रसंगी आंध्र प्रदेशचे उपमुख्यमंत्री के पवन कल्याण यांची उपस्थिती राहणार आहे.
केंद्र सरकारच्या वतीने लातूर येथील नदी पुनर्जीवन आणि जलसंधारण कामाची दखल घेऊन या परिषदेसाठी महादेव गोमारे यांना विशेष निमंत्रित करण्यात आले आहे. महादेव गोमारे हे या परिषदेमध्ये दिनांक ११ नोव्हेंबर रोजी लातूर येथील नदी पुनर्जीवन प्रकल्पाचे सादरीकरण करणार आहेत.—–बातमीची चौकट*परिषदेत एक राष्ट्रव्यापी धोरण तयार करण्यात येणार*दोन दिवस चालणाऱ्या या परिषदेमध्ये देशात पुढील काळात येणाऱ्या पाण्याच्या समस्या लक्षात घेऊन एक राष्ट्रव्यापी धोरण तयार करण्यात येणार आहे. तसेच या जल महोत्सवामध्ये देशातील निवडक सामाजिक संस्था आणि सरकार यांच्या समन्वयातून देशातील पाणी प्रश्न अधिक सक्षमपणे सोडविण्यासाठी सकारात्मक चर्चा करून काही निर्णय होणार आहेत.
