“काम, विकास आणि विचाराला मत द्या” —माजीमंत्री बसवराज पाटील
भाजप–शिवसेना–रिपाई युतीचा कार्यकर्ता मेळावा आणि शुभारंभ सभा
औसा : भाजप–शिवसेना–रिपाई युतीचा भव्य कार्यकर्ता मेळावा आणि शुभारंभ सभा २० नोव्हेंबर रोजी औसा येथे उत्साहात आणि शक्तिप्रदर्शनाच्या वातावरणात पार पडली. तीन प्रमुख नेत्यांनी—माजी मंत्री बसवराज पाटील, आमदार संभाजी पाटील निलंगेकर आणि आमदार अभिमन्यू पवार—युतीची विकासनिष्ठ भूमिका स्पष्टपणे मांडत औसाच्या नागरिकांना विकासाच्या मुद्द्यावर मतदान करण्याचे आवाहन केले.
सभेचे अध्यक्ष बसवराज पाटील म्हणाले, “औसा बदलण्यासाठी आम्ही व्यापक पातळीवर काम केले आहे. आम्हाला आमच्या कामाला, विकासाला आणि विचाराला मत द्या. जात–धर्माच्या पलीकडे जाऊन विकासाचे राजकारण करणारी ही युती आहे.” पाटील यांनी सांगितले की, सामाजिक समतोल राखत उमेदवारी दिली असून खऱ्या अर्थाने काम करणाऱ्या कार्यकर्त्यांनाच संधी देण्याचा प्रयत्न झाला आहे. “औसेकर विकासाला मत देणारे आहेत आणि संधी आमच्याकडेच येईल,” असा विश्वास त्यांनी व्यक्त केला.
यावेळी मंचावर आमदार संभाजी पाटील निलंगेकर, आमदार अभिमन्यू पवार, आमदार रमेश कराड, शिवसेनेचे जिल्हाप्रमुख शिवाजी माने,नगराध्यक्ष पदाच्या उमेदवार डॉ ज्योती महादेव बनसुडे यांच्यासह पदाधिकारी व कार्यकर्ते उपस्थित होते.
यावेळी बोलताना आमदार संभाजी पाटील निलंगेकर यांनी सरकारी योजना सर्व समाजघटकांसाठी समानपणे दिल्याचे सांगत विकास हेच मुख्य ध्येय असल्याचे स्पष्ट केले. “लाडकी बहीण आणि आरोग्य योजना एका जात–धर्मापुरत्या नाहीत. आम्ही टीम भाजप म्हणून एका दिशेने काम करतो आहोत. ही निवडणूक कार्यकर्त्यांची आहे आणि कार्यकर्त्यांना पदावर बसवण्यासाठी आम्ही पूर्ण ताकद लावत आहोत,” असे ते म्हणाले. त्यांनी अभिमन्यू पवार यांच्या शेत रस्त्यांसारख्या आदर्श विकासकामांचा विशेष उल्लेख केला.
सभेत आमदार अभिमन्यू पवार यांनीही दमदार भाषण करत विरोधकांवर निशाणा साधला. “जिल्ह्यात भाजपचे वातावरण आहे. सबका साथ, सबका विकास या ब्रीदवाक्यावर आम्ही निवडणुकीला सामोरे जात आहोत. औसा शहरासाठी तब्बल ५०० कोटींचा निधी उपलब्ध करून विकासकामांची मालिका उभी केली आहे,” असे ते म्हणाले उपजिल्हा रुग्णालय, पाणीपुरवठा योजना, रस्ते विकास, नवीन बसस्थानक यांसारखी कामे जलद गतीने पूर्ण झाल्याची माहिती त्यांनी दिली.नगरपालिकेने काही विकासकामांसाठी आवश्यक प्रमाणपत्र न दिल्याचा आरोप करत पवार म्हणाले, “हीच ती वेळ आहे… विकासाच्या आड येणाऱ्यांना घरी बसवा.” उमेदवारी न मिळालेल्या कार्यकर्त्यांनी घरी न बसता पक्षाच्या विजयासाठी कामाला लागावे, असे आवाहनही यावेळी त्यांनी केले.एकूणच, औसाच्या राजकीय वातावरणात युतीने विकास हा मुख्य मुद्दा ठरवत निवडणुकीची दिशा स्पष्ट केल्याचे या मेळाव्यातून दिसून आले. या मेळाव्याचे प्रास्ताविक माजी नगराध्यक्ष किरण उडगे यांनी केले तर सूत्रसंचालन भाजपाचे मंडळाध्यक्ष शिव मुरगे यांनी केले कार्यक्रमाचे आभार चंद्रशेखर सोनवणे यांनी मांनले…….
