महायुतीतील घटकपक्षांना सत्तेचा वाटा देऊ मात्र पक्ष संघटनेसाठी कोणतीही तडजोड नाही
माजी मंत्री आ. संभाजी पाटील निलंगेकर यांचे प्रतिपादन
लातूर/प्रतिनिधी :जगातील सर्वात मोठा राजकीय पक्ष बनवत विधानसभा निवडणुकीत घवघवीत यश मिळवून देण्यात कार्यकर्त्यांचे मोठे योगदान असून यासाठी त्यांनी अपार मेहनतही घेतली आहे. कार्यकर्त्यांच्या संघटन शक्तीमुळेच भाजपा नंबर वन आहे. आता त्याच कार्यकर्त्यांच्या म्हणजेच स्थानिक स्वराज्य संस्था निवडणूका होवू घातलेल्या आहेत. या निवडणूकांना महायुती म्हणून जरी सामोेरे जात असलो तरी महायुतीतील घटक पक्षांनी कार्यकर्त्यांवर केलेला अन्याय खपवून घेणार नाही, असे सांगत महायुतीतील घटक पक्षांना सत्तेचा वाटा देऊ मात्र, कार्यकर्त्यांनी उभा केलेल्या पक्ष संघटनमध्ये कोणतीही तडजोड होणार नाही , असे सांगून आम्ही कार्यकर्त्यांच्या निवडणूकीत तन, मन, धनाने खंबीरपणे त्यांच्या पाठीशी उभे राहणार असल्याची ग्वाही माजी मंत्री तथा जिल्हा निवडणूक प्रभारी आ. संभाजी पाटील निलंगेकर यांनी दिली .
पालकमंत्री शिवेंद्रराजे भोसले यांच्या उपस्थितीत जिल्हा भाजपा कार्यालयात झालेल्या पदाधिकारी व कार्यकर्त्यांच्या मेळाव्यात माजी मंत्री आ. निलंगेकर बोलत होते. या वेळी व्यासपीठावर जिल्हाध्यक्ष बस्वराज पाटील मुरुमकर, आ. रमेश कराड, माजी आ. शिवाजीराव पाटील कव्हेकर, माजी आ. बब्रुवान खंदाडे, लातूर शहर जिल्हाध्यक्ष अजित पाटील कव्हेकर, शहर निवडणूक प्रमुख डॉ. अर्चनाताई पाटील चाकूरकर, गणेश हाके, माजी जिल्हाध्यक्ष दिलीपराव देशमुख, उदगीरचे माजी नगराध्यक्ष राजेश्वर निटूरे आदींची प्रमुख उपस्थिती होती.
राज्यात महायुती म्हणून भाजपा-शिवसेना आणि राष्ट्रवादी काँग्रेस पक्ष हे तिघेजण सत्तेत सहभागी असल्याचे सांगत माजी मंत्री तथा जिल्हा निवडणूक प्रभारी आ. संभाजी पाटील निलंगेकर म्हणाले की, महायुतीचा धर्म निभावताना तिन्ही घटक पक्षातील नेते पदाधिकारी व कार्यकर्ते यांनी योग्य समन्वयाची भूमिका बजावणे अत्यंत गरजेचे आहे मात्र, महायुतीतील घटक पक्ष आपल्या पक्षातील कार्यकर्त्यांवर अन्याय करत असतील तर तो सहन होणारा नाही. कार्यकर्त्यांमुळे भाजपा आज जगातील सर्वात मोठा राजकीय पक्ष बनलेला आहे. कार्यकर्त्यांचे समर्पण, त्याग आणि त्यांची अपार मेहनत यामुळेच केंद्रात व राज्यात भाजपा सत्तेत आलेली आहे. कार्यकर्त्याला भाजपात मोठे महत्व असून कार्यकर्त्यांमुळेच आम्हा सर्वांना लोकप्रतिनिधी म्हणून काम करण्याची संधी मिळाली असल्याचे माजी मंत्री आ. निलंगेकर यांनी सांगितले.
आता कार्यकर्त्यांच्या म्हणजेच स्थानिक स्वराज्य संस्था निवडणूका होऊ घातलेल्या आहेत. ज्या कार्यकर्त्यांनी पक्ष संघटन वाढवत पक्षाला सत्तेत बसवले त्या कार्यकर्त्यांना आता सत्तेत बसविण्याची वेळ आली असल्याचे माजी मंत्री आ. निलंगेकर यांनी सांगितले. त्यामुळे महायुतीतील घटक पक्षांनी या निवडणूकांमध्ये आमच्या कार्यकर्त्यांवर केलेला अन्याय खपवून घेणार नाही, असे सांगत महायुतीतील घटक पक्षांना सत्तेत सहभाग देवू मात्र संघटनेत नाही, असेही स्पष्ट केले.
आगामी स्थानिक स्वराज्य संस्थां निवडणूकीत लोकाभिमूख आणि जनतेची कामे करणाºया कार्यकर्त्यांनाच निवडणूक लढविण्याची संधी दिली आहे. या कार्यकर्त्यांना निवडून आणणे आमच्या सर्वांची जबाबदारी असून यासाठी त्यांच्या पाठिशी आम्ही तन, मन, धन लावून खंबीरपणे उभे राहत, अहोरात्र परिश्रम घेवू, अशी ग्वाही देवून जिल्ह्यातील चार नगरपालिका आणि एका नगरपंचायतीवर भाजपाचा झेंडा फडकावू असा विश्वास दिला.
