लातूर : शहरातील दामिनी पथकाने दाखवलेल्या तात्काळ प्रतिसादामुळे एका कॉलेज तरुणीवरील मोठा अनर्थ टळला. एका सजग नागरिकाने योग्य वेळी दिलेल्या माहितीमुळे आरोपीला काही मिनिटांत ताब्यात घेण्यात पोलिसांना यश आले.
प्राप्त माहिती नुसार, दि. १८ नोव्हेंबर २०२५ रोजी सकाळी १०.३० वाजता शहरात पेट्रोलिंग करत असताना दामिनी पथकाला एका नागरिकाने माहिती दिली की, एक कॉलेजची मुलगी रडत आहे व एक युवक तिला “हात कापतो आणि तुझे नाव घेतो” अशा धमक्या देत एका हॉटेलमध्ये घेऊन गेला आहे.माहिती मिळताच दामिनी पथकाने केवळ ७ ते ८ मिनिटांत घटनास्थळी धाव घेऊन पीडित तरुणी व आरोपीला ताब्यात घेऊन शिवाजीनगर पोलीस ठाण्यात हजर केले.
पीडितेने दिलेल्या जबाबात सांगितले की, विशाल वाळासाहेब केकान (रा. केकानबाडी, ता. केज, जि. बीड) हा व्हॉटसअप व फोनवरून सतत त्रास देत होता. “मी माझा जीव देतो” अशा इमोशनल ब्लॅकमेलद्वारे त्याने तिला अंबाजोगाई रोडवरील अक्षय स्विमींगपुलजवळ बोलावले. “मी रूम बुक केली आहे, माझ्यासोबत चल, नाहीतर मी हात कापतो” असे म्हणत त्याने तिचा हात धरून शिवीगाळ करत धमक्या देत तिला हॉटेलकडे घेऊन जात होता. या प्रकरणी शिवाजीनगर पोलीस ठाण्यात गु.र.नं. 445/2026 अन्वये कलम 74, 75, 78(2), 79, 352, 351(2) बीएनएस प्रमाणे गुन्हा दाखल करण्यात आला असून पुढील तपास सपोनि सुप्रिया केंद्रे करीत आहेत.
एका वाटसरूने प्रसंगाचे गांभीर्य ओळखून दामिनी पथकाला फोन केल्याने हा अनर्थ टळला. नागरिकांनी अशाच प्रकारची छेडछाड, धमकी किंवा त्रास होत असल्यास दामिनी पथकाचा नंबर — 8830115409 वर संपर्क साधावा. तक्रारदाराची ओळख गोपनीय ठेवण्यात येईल, असे आवाहन करण्यात आले आहे.ही कारवाई पोलीस अधीक्षक अमोल तांबे, अपर पोलीस अधीक्षक मंगेश चव्हाण यांच्या मार्गदर्शनाखालीउपविभागीय पोलिस अधिकारी समीरसिंह साळवे, पोनि अभिषेक शिंदे तसेचपोलीस अंमलदार प्रशांत नागरगोजे, भाग्यश्री झोडपे, पल्लवी चिलगर यांनी केली.
