‘वंदे मातरम्’ गीताचे लातूर येथे सामूहिक गायन; नागरिक, विद्यार्थ्यांच्या उत्स्फूर्त सहभाग
लातूर, दि. ०७ (प्रतिनिधी) : कवी बंकिमचंद्र चट्टोपाध्याय यांनी १८७५ साली लिहिलेले ‘वंदे मातरम्’ या गीतास आज दीडशे वर्षे पूर्ण झाली, ऐतिहासिक व सांस्कृतिकदृष्ट्या या महत्वाच्या घटनेनिमित्त लातूर जिल्हा क्रीडा संकुल येथे या गीताचे सामूहिक गायन करण्यात आले. या उपक्रमात विद्यार्थी व नागरिकांनी उस्फुर्त सहभाग नोंदविला. तसेच यानिमित्ताने तयार करण्यात आलेली विशेष लघुनाटिका सादर करण्यात आली.
आमदार विक्रम काळे, अपर जिल्हाधिकारी शिल्पा करमरकर, शिक्षणाधिकारी तृप्ती अंधारे, कौशल्य विकास व उद्योजकता मार्गदर्शन केंद्राचे सहायक आयुक्त निशांत सूर्यवंशी, शिक्षण महर्षी वसंतराव काळे शासकीय औद्योगिक प्रशिक्षण संस्थेचे प्राचार्य एस. व्ही. माळकुंजे, जिल्हा व्यवसाय शिक्षण व प्रशिक्षण अधिकारी पी. जे. औताडे यांच्यासह शिक्षक, विद्यार्थी यावेळी मोठ्या संख्येने उपस्थित होते.
वंदे मातरम् गीताला दीडशे वर्षे पूर्ण झाल्यानिमित्त संपूर्ण देशभरात सकाळी ९.५० वाजता एकाच वेळी या गीताचे सामूहिक गायन करण्यात आले. लातूर जिल्हा क्रीडा संकुल येथे झालेल्या जिल्हास्तरीय कार्यक्रमात आमदार श्री. काळे यांनी आपल्या मनोगतात ‘वंदे मातरम्’ हे गीत प्रेरणादायी असल्याचे सांगितले. अपर जिल्हाधिकारी श्रीमती करमरकर, प्रा. परमेश्वर हासबे यांनीही यावेळी मार्गदर्शन केले.
राज्यातील सर्व शासकीय औद्योगिक प्रशिक्षण संस्थांमध्ये ‘वंदे मातरम्’ गीतगायन, देशभक्तिपर भाषणे, वक्तृत्व स्पर्धा, निबंध लेखन स्पर्धेचे आयोजन करण्यात आले होते. यामधील विजेत्यांना मान्यवरांच्या हस्ते बक्षीस वितरण करण्यात आले.
