बाबासाहेब आंबेडकर यांच्या पूर्णाकृती पुतळ्याचे अनावरण

उदगीर येथे भारतरत्न डॉ. बाबासाहेब आंबेडकर यांच्या पूर्णाकृती पुतळ्याचे अनावरण

भारतरत्न डॉ. बाबासाहेब आंबेडकर यांनीसमृद्ध लोकशाहीचा पाया रचला

• सहकार मंत्री बाबासाहेब पाटील

लातूर, दि. 31 : भारतरत्न डॉ. बाबासाहेब आंबेडकर यांनी अंधारलेल्या समाजाला समतेचा दिवा देवून लोकशाहीच्या मार्गाने चालण्याची दिशा दाखवली. भारतीय संविधानाच्या माध्यमातून त्यांनी आपल्या समृद्ध लोकशाहीचा भक्कम पाया रचला. त्यामुळे आज प्रत्येक समाज घटकाला विकासाची समान संधी उपलब्ध झाली असल्याचे प्रतिपादन सहकार मंत्री बाबासाहेब पाटील यांनी केले.

उदगीर येथील नांदेड ते बिदर मार्गालगत उभारण्यात आलेल्या भारतरत्न डॉ. बाबासाहेब आंबेडकर यांचा पूर्णाकृती पुतळा व स्मारकाच्या लोकार्पण समारंभानिमित्त गुरुवारी सायंकाळी तालुका क्रीडा संकुल येथे उपस्थितांना मार्गदर्शन करताना सहकार मंत्री श्री. पाटील बोलत होते. सार्वजनिक बांधकाम राज्यमंत्री इंद्रनील नाईक, आमदार अमोल मिटकरी, आमदार संजय बनसोडे, आमदार प्रताप पाटील चिखलीकर, माजी खासदार प्रा. जोगेंद्र कवाडे, भदंत उपगुप्त महाथेरो, भंते पय्यानंद, भंते नागसेन बोधी, शिल्पा बनसोडे, माजी आमदार गोविंद केंद्रे, माजी नगराध्यक्ष राजेश्वर निटुरे, उषा कांबळे, माजी जिल्हा परिषद अध्यक्ष राहुल केंद्रे, माजी उपाध्यक्ष रामचंद्र तिरुके, उपजिल्हाधिकारी सुशांत शिंदे, तहसीलदार राम बोरगावकर, मुख्याधिकारी सोमानाथ जाधव, भरत चामले यांची यावेळी प्रमुख उपस्थिती होती. यावेळी विविध विकास कामांचे भूमिपूजन करण्यात आले.

भारतीय संविधानाच्या निर्मितीसोबतच भारतरत्न डॉ. बाबासाहेब आंबेडकर यांनी शेती, सिंचन प्रकल्प, अर्थकारण, समाजकारण यासारख्या विविध क्षेत्राशी निगडीत विषयांवर आपले विचार मांडले केले. त्यांचे हे विचार आजही आपल्याला मार्गदर्शक ठरत आहेत. भारतरत्न डॉ. बाबासाहेब आंबेडकर यांचा पूर्णाकृती पुतळा आणि स्मारकाचे उद्घाटन उदगीर येथे झाले असून त्यांनी दाखवलेल्या मार्गावर चालण्यासाठी हे स्मारक व पुतळा प्रेरणा देईल, असा विश्वास सहकार मंत्री श्री. पाटील यांनी व्यक्त केला. उदगीर शहरातील विश्वशांती बुद्धविहार परिसरातील सुशोभिकरण आणि रस्ते विकास कामांमुळे नागरिकांना चांगल्या सुविधा उपलब्ध होण्यास मदत होईल, असे ते म्हणाले.

भारतरत्न डॉ. बाबासाहेब आंबेडकर हे केवळ नाव नाही, तर एक प्रेरणा आहे, एक चेतना आहे. त्यांचा पूर्णाकृती पुतळा उदगीर शहरात उभारण्यात आला असून हा पुतळा पुढील पिढीला संघर्षाची प्रेरणा देत राहील. भारतरत्न डॉ. बाबासाहेब आंबेडकर यांनी दाखविलेल्या मार्गावर चालण्याचा आपला सदैव प्रयत्न असून यामाध्यमातून समाजातील विविध घटकांच्या विकासासाठी काम करीत असल्याचे आमदार संजय बनसोडे यांनी सांगितले. विश्वशांती बुद्धविहार परिसरात नागरिक, मुलांसाठी चांगल्या सुविधा उपलब्ध करून देण्यासाठी बगीचा आणि किडो वंडर लँड व पार्क विकसित केले जाणार आहे, असे आमदार श्री. बनसोडे म्हणाले.

या कार्यक्रमाच्या निमित्ताने राज्याचे उपमुख्यमंत्री अजित पवार यांनी दिलेला संदेश आमदार अमोल मिटकरी यांनी यावेळी वाचून दाखविला. उदगीरच्या विकासासाठी निधी कमी पडू देणार नसल्याचे उपमुख्यमंत्र्यांनी आपल्या संदेशात नमूद केले, तसेच अतिवृष्टीने संकटात सापडलेल्या शेतकऱ्यांसाठी राज्य शासनामार्फत राबविण्यात येत असलेल्या उपाययोजनांची माहिती त्यांनी आपल्या संदेशात दिली.

प्रा. जोगेंद्र कवाडे, रामचंद्र तिरुके यांनीही यावेळी आपले मनोगत व्यक्त केले. कार्यक्रमाचे सूत्रसंचालन ज्योती अंबेकर यांनी केले. यावेळी गायक आदर्श शिंदे यांच्या भिमगितांचा कार्यक्रम आयोजित करण्यात आला होता.