*लाडकी बहीण योजना चालूच राहणार : मुख्यमंत्री देवेंद्र फडणवीस**युतीच्या पाठीशी आपली ताकद उभी करा*
पुढील पाच वर्षे आम्ही तुमची काळजी करू- फडणवीस
उदगीर : ( माध्यम वृत्तसेवा )राजकारणाच्या आखाड्यात कुस्ती आणि आणि विकासाच्या राजकारणात दोस्ती अशी उदगीरची ओळख आहे. उदगीर जिल्हा हवा आहे अशी उदगीरकरांची अनेक दिवसांपासूनची मागणी आहे. आचारसंहिता संपल्यानंतर या मागणीवर नक्की विचार केला जाईल ,असे सांगत मुख्यमंत्री देवेंद्र फडणवीस यांनी आमदार संजय बनसोडे यांनी पुढाकार घेतल्यामुळे उदगीर नगर परिषदेमध्ये भाजपा- राष्ट्रवादी काँग्रेसची युती झाली असे सांगत बनसोडे यांचे जाहीर अभिनंदन केले.
राज्य सरकारच्या वतीने चालू असलेली लाडकी बहीण योजना बंद होणार असल्याच्या अफवा विरोधकांकडून पसरविल्या जात आहेत. परंतु जोपर्यंत देवेंद्र फडणवीस आहे तोपर्यंत ही योजना बंद होणार नाही असे जाहीर आश्वासन राज्याचे मुख्यमंत्री देवेंद्र फडणवीस यांनी उदगीर येथे नगर परिषद निवडणूकीच्या निमित्ताने आयोजित जाहीर सभेत बोलताना दिले. उदगीर येथील भारतीय जनता पक्ष व राष्ट्रवादी काँग्रेस युतीच्या वतीने आयोजित जाहीर सभेत मुख्यमंत्री देवेंद्र फडणवीस बोलत होते.
यावेळी व्यासपीठावर माजी मंत्री आ.संजय बनसोडे, माजी मंत्री आ. संभाजीराव पाटील निलंगेकर, आ. अभिमन्यू पवार,आ. रमेश कराड, कर्नाटकचे माजी मंत्री भगवंत खुब्बा, माजी खा. सुधाकर शृंगारे, डॉ.अर्चनाताई पाटील चाकूरकर, भाजपाचे जिल्हाध्यक्ष बसवराज पाटील मुरूमकर, माजी आमदार गोविंद केंद्रे, अरविंद पाटील निलंगेकर, माजी नगराध्यक्ष राजेश्वर निटूरे, राहुल केंद्रे, रामचंद्र तिरुके, अमोल निडवदे, सुनील सावळे, उषा कांबळे, उत्तराताई कलबुर्गे,भगवान पाटील , बसवराज बागबंदे,ऍड. व्यंकट बेद्रे, माजी आमदार बब्रुवान खंदाडे, गणेश हाके, मनोज पुदाले, सुधीर भोसले, ऍड. दत्ता पाटील, प्रा.श्याम डावळे, बाळासाहेब मरलापल्ले, राष्ट्रवादीचे तालुकाध्यक्ष बालाजी भोसले, शहराध्यक्ष सय्यद जानीमियाँ, वसंत पाटील, रामदास बेंबडे, अमोल अनकल्ले, शशिकांत बनसोडे, युतीच्या अध्यक्षपदाच्या उमेदवार सौ.स्वाती सचिन हुडे , माजी नगरसेवक सचिन हुडे यांच्यासह भाजपा व राष्ट्रवादीचे कार्यकर्ते उपस्थित होते .
पुढे बोलताना मुख्यमंत्री देवेंद्र फडणवीस यांनी उदगीरचे ऐतिहासिक महत्त्व अधोरेखित करत उदगीरची ओळख आखाडा, कुस्ती आणि विकासातील दोस्ती अशी असल्याचे सांगुन मुख्यमंत्र्यांनी जनतेचे आरोग्य अबाधित राहण्यासाठी भुयारी गटार योजना राबवित असल्याचे सांगितले. या योजनेच्या पहिल्या टप्प्याचे काम प्रगतीपथावर असून लवकरच दुसऱ्या टप्प्यास मंजुरी देण्यात येणार आहे. लवकरच उदगीर शहर नाली मुक्त होणार असल्याचे सांगितले. वाढत्या शहरीकरणामुळे अन्न, वस्त्र निवारा सोबतच रोजगार, शिक्षण आरोग्याच्या समस्या शहरात निर्माण झाल्या आहेत. या समस्यांचे निराकरण करण्यासाठी राज्य सरकार प्रयत्नशील असल्याचे सांगितले.
संविधान दिनानिमित्त बोलताना, लोकशाही आणि समानतेचे श्रेय विश्वरत्न प.पु. डॉ.बाबासाहेब आंबेडकरांना असून आता राज्यकर्ते मताच्या पेटीतून निवडला जातो असे ते म्हणाले.शहरातील अतिक्रमण, कचरा, पाण्याची समस्या आणि प्रदूषण यावर उपाययोजना सुरू असल्याचे नमूद करत अटल योजनेतून महाराष्ट्राला ५० हजार कोटी तर उदगीरमध्ये भुयारी गटार योजना आणि लिंबोटी पाणीपुरवठा योजना गतीने राबवित असल्याचे मुख्यमंत्र्यांनी स्पष्ट केले. १४० कोटींच्या भुयारी गटार योजनेचा पहिला टप्पा पूर्ण झाल्याचे तर दुसरा टप्पा लवकरच सुरू होणार असल्याचे आश्वासन त्यांनी यावेळी दिले.
प्रास्ताविक भाजपाचे जिल्हाध्यक्ष बसवराज पाटील मुरूमकर यांनी केले. माजी मंत्री आ. संजय बनसोडे यांनी राज्य सरकारने शेतकऱ्यांना संकटात साथ देण्याचे काम केले असून, आपण आमदारकीच्या काळात उदगीर मतदार संघाचा सर्वांगीण विकास केल्याचे सांगितले.
उदगीर जिल्हा निर्मितीसाठी आवश्यक त्या इमारती उभ्या झाल्या असून मुख्यमंत्री महोदयांनी उदगीरकरांना आश्वस्थ करावे अशी अपेक्षा आ. संजय बनसोडे यांनी यावेळी व्यक्त केली.नवीन जिल्ह्यांच्या मागणीवर सकारात्मक विचार करणार असल्याचेही मुख्यमंत्री म्हणाले. उदगीर मध्ये नगर परिषदेच्या निवडणूकीसाठी माजी मंत्री आ. संजय बनसोडे यांनी युती केल्याबद्दल आ.संजय बनसोडे यांचे अभिनंदन केले. उदगीर मध्ये भाजपा व राष्ट्रवादीच्या सर्व उमेदवारांना विजयी करण्याचे आवाहन मुख्यमंत्र्यांनी केले.आभार प्रदर्शन रामचंद्र तिरुके यांनी केले.यावेळी उदगीर शहर व परिसरातील नागरिक व महिला मोठ्या संख्येने उपस्थित होते.
***************************
